Nicola Lagioia ka debutuar në vitin 2001 me romanin e tij të parë “Tre sistemi per sbarazzarsi di Tolstoj (senza risparmiare se stessi)” [Tre sisteme për të hequr qafe Tolstoin (pa kursyer veten)]. Që nga ky debutim ai ka fituar një sërë çmimesh letrare në karrierën e tij, si në nivel kombëtar ashtu edhe ndërkombëtar, mes të cilave mund të përmenden çmimi letrar “Scanno, Super Premio Vittorini” ashtu si edhe çmimi më i rëndësishëm letrar në Itali “Strega” në vitin 2015 me romanin “Egërsia”. Në vitin 2010 është cilësuar si një nga shkrimtarët më të mirë bashkëkohorë, nën moshën 40-vjeçare. Ka qenë anëtar jurie në Festivalin e Venecies dhe drejtor programacioni në Panairin e Torinos. Lëvrues i disa zhanreve letrare, si romani, tregimet dhe eseja, ai mbetet një prej shkrimtarëve më të pëlqyer italianë.

Erion Gjatolli është diplomuar në Gjuhë dhe Kulturë Italiane në vitin 2005 në Universitetin Shtetëror të Tiranës. Në vitin 2015 përktheu romanin e Alberto Moravia-s “Mërzia”,  në vitin 2016  romanin e Daniele Del Giudice “Horizont i lëvizshëm” (Fitues i “Çmimit Europian në Letërsi” EUPL) dhe në vitet 2017-2019 romanet e Paulo Coelho-s:  “Dorëshkrimi i gjetur në Akra”, “Spiunia” dhe “Hipi”. Ai ka vijuar me autorë të tjerë italianë si Giulia Besa me romanin e saj “Binjake” (2021). Gjatolli ka përkthyer gjithashtu serinë e eseve dhe kujtimeve nga gjuha italiane: “Scritti corsari” nga Pier Paolo Pasolini, “I segreti di Istanbul” nga Corrado Augias dhe “Un innocente in trappola” nga Massimo Romagnoli.

Erion Gjatolli gjithashtu ka përkthyer nga italishtja në gjuhën shqipe tregime të shkurtra dhe punë poetike të botuara në gazeta dhe revista letrare (Dino Buzzato, Pier Paolo Pasolini, Fabrizio De Andre) dhe shfaqje teatrale të vëna në skenë në Teatrin Kombëtar në Tiranë (István Örkény), dhe tregime të shkurtra e poezi nga shqipja në italisht të botuara në një antologji italiane (Idea, Sansoni).

Që nga viti 2008 ai ka përkthyer shumë filma, serialë televizivë dhe dokumentarë për rrjete televizive lokale, festivale kombëtare dhe ndërkombëtare të filmit (Tirana International Film Festival, Giffoni Film Festival, Digitalb).