Gelanda Shkurtaj
Gelanda SHKURTAJ, ka lindur në Tiranë. Mbaron studimet e plota (MSc) në Universitetin e Tiranës pranë Fakultetit të Shkencave të Natyrës në “Biologji”. Duke nisur prej vitit 1994 ndan jetën e saj midis Tiranës dhe Italisë ku vijon shkollimin për “Drejtësi” dhe mbaron studimet e plota (MSc) në Universitetin e Genova-s duke u diplomuar në Fakultetin Juridik. Punon si Këshilltare ligjore dhe Eksperte e Drejtorisë së Përgjithshme të Antimafies pranë Prokurorisë së Përgjithshme të Genova-s. Mbaron studimet pas-Universitare LLM në të “Drejtën Tatimore Ndërkombëtare” në Genova dhe po aty vijon praktikën pranë Dhomës së Avokatisë. Në vitet 2011-2014 punon si konsulente e fondeve të BE-së për Archidata (Milano) dhe Senior Project Manager për Shqipërinë, në programin “IPA Cross Border 2007-2013” (L’Aquila-Abruzzo). Nga kthimi në Shqipëri punon si Pedagoge në disa Universitete në Shqipëri, dhe prej vitit 2016 ajo mban pozicionin e Lektores në lëndët e së “Drejtës Civile”, “Drejtës Tatimore” dhe “Drejtës së Biznesit” në Universitetin “Epoka” Tiranë.
Në vitin 2018 merr gradën “Doktor i Shkencave” në fushën e “Antropologjisë Ligjore” pranë Akademisë së Studime-ve Albanologjike. Ajo është zgjedhur korrespondente shkencore e Revistës “International Tax Law Review” e Universitetit “La Sapienza” Romë. Gjithashtu vijon të thirret si Lektore e jashtme pranë këtij Universiteti, në Fakultetin e Shkencave Politike ku jep leksione në nivelin Master në lidhje me “Fiskalitetin në Ballkan dhe Shqipëri”. Ka një ekspertizë të konsoliduar në sistemet juridike të krahasuara të fituar nga eksperiencat e pashkëputura me Universitetin “Temple” (Philadelphia Sh.b.a) dhe “Worcester College” në Oxford (Mbretëri e Bashkuar). Është anëtare e bordit të shkollës doktorale “Wasatia Graduate School for Peace and Conflict Resolution” Flensburg (Gjermani). Mbajnë autorësinë e saj shumë artikuj shkencorë të publikuar në revista ndërkombëtare si dhe shumë artikuj publicistikë në të përditshmen “Panorama” Shqipëri.
