Fatmir Toçi është lindur në Tiranë, në prill 1958. Mësimet e para, deri në përfundimin e shkollës së mesme, i kreu në disa vende të Shqipërisë, si Borakë (Shijak), Tiranë, Kurbnesh e Rrëshen të Mirditës, Kavajë, për shkak të detyrës si ushtarak të të atit. Studioi në Universitetin e Tiranës në Fakultetet e Ekonomisë dhe, më pas, në atë të Gjuhë -Letërsisë. Ka punuar në sektorë të ndryshëm të ekonomisë dhe administratës shtetërore në poste drejtuese, pedagog i gjuhës italiane në Akademinë Ushrarake etj., deri në janar 1993 kur themeloi Shtëpinë Botuese Toena, më pas Institutin e Librit dhe të Promocionit dhe Revistën Universi Shqiptar i Librit. Ka qenë për shumë vjet kryetar i Shoqatës së Botuesve Shqiptarë, kryetar i Lidhjes së Botuesve Shqiptarë, anëtar i Këshillit Drejtues të Radiotelevizionit Shqiptar (2005 -2009), nënkryetar i SHKA “Labëria” dhe deputet në Kuvendin e Shqipërisë për dy legjislatura (2009 -2017). Është vlerësuar me urdhra e medalje të ndryshme nga presidenti i Republikës së Shqipërisë, presidenti i Republikës së Italisë, institucione qendrore shqiptare, njësi të pushtetit lokal dhe shoqata të ndryshme brenda e jashtë Shqipërisë. Është autor i disa botimeve për mësimin e italishtes, vepra histoike dhe përmbledhje publicistike.