Arta Marku është arkitekte shqiptare e kthyer në gazetare kulture. Karrierën e saj si gazetare e kulturës e ka filluar që në vitin 1993, në gazetën “Koha Jonë” për të vijuar me të përditshmet më të rëndësishme në vend si “Gazeta Shqiptare”, “Shekulli”, “Shqip”, “Panorama” etj. Si kryeredaktore ka drejtuar periodikë në natyrës social-kulturore sikurse “AKS”, “Spektër”, “VIP”, “Psikologji”, “Letra nga Diaspora” etj. Ka bashkëpunuar dhe vijon, nëpërmjet shkrimeve me media të karakterit letrar dhe kulturor si “Mehr LICHT”, “Art & Trashëgimi”, “Klan”, “Milosao”, “ExLibris” etj.

Prej vitit 2014, është drejtuese e programit të përjavshëm televiziv “Bibliotekë”, në bosht të të cilit janë intervistat me shkrimtarë, përkthyes dhe studiues të letrave, është fokusuar tërësisht te libri. Paralelisht boton artikuj analitikë dhe recensa mbi botimet e reja që dominojnë tregun e librit në Shqipëri. Gjithnjë me njerëz të letrave ajo ka organizuar takime publike, nën siglën “Agora”. Është autore e përmbledhjes me tregime “Kthinat e kujtesës” dhe bashkautore në librin “Letrat e mia kredenciale”, një intervistë e gjatë dhe e plotë me shkrimtarin Besnik Mustafaj. Si përkthyese ka sjellë në shqip disa libra mes të cilëve botime mbi arkitekturën që e lidhin atë me diplomimin e saj.