Kastriot Tusha u lind në Elbasan më 14 prill 1963. Shkollën e mesme artistike e kreu në qytetin e lindjes, ndërsa u diplomua në degën e Kantos, në Akademinë e Arteve, në Tiranë, më 1988, me rezultate shumë të mira. Në 1989 fitoi vendin e solistit në TOB, Tiranë. Në periudhën 1999-2006, ishte pedagog i jashtëm në Katedrën e Kantos në Akademinë e Arteve dhe nga 2006 e në vazhdim është pedagog pranë Fakultetit të Muzikës në Universitetin e Arteve të Tiranës.

Përveç aktivitetit pedagogjik, ku i është dhënë titulli prof. as., aktiviteti i tij artistik është shumë i ngjeshur dhe i shumëllojshëm. Ai interpreton në të gjitha skenat e vendit duke përballuar me sukses një repertor të gjerë, nga paraklasikët deri te bashkëkohorët. Disa role të realizuara me nivel të lartë artistik janë: Beppe në “Pagliaci”, Kola në “Paja”, Nadiri në “Peshkatarët e perlave”, Alfredo në “Traviata”, Doda në “Mrika”, Trimori në “Dasma Arbëreshe”, Duka në “Rigoleto”, etj.

Ka realizuar mbi 100 koncerte vokalo-instrumentale, si dhe një numër të konsiderueshëm koncertesh recitale. Është themelues i koncerteve të “Tre Tenorëve” në Shqipëri dhe vazhdon t’i përballojë me sukses këto koncerte impenjative.

Është edhe lëvrues i suksesshëm i gjinisë së romancës, ku ka një kontribut të vyer në interpretimin e tyre. Gjithashtu ka një kontribut shumë të madh në realizimin e suksesshëm të shumë këngëve popullore, të cilat janë formate të mrekullueshme, që ndiqen nga këngëtarët e rinj. Ai ka realizuar një numër të konsiderueshëm koncertesh edhe jashtë shtetit, si në Itali, Gjermani, SHBA, Greqi, Rumani, Francë, Maqedoni, Mali i Zi etj.

Për gjithë këtë kontribut të çmuar, i është dhënë titulli “Mjeshtër i Madh”, si dhe gëzon vlerësim maksimal nga publiku i gjerë.

Në vitin 2013, iu dha çmimi “Kult”, si Këngëtari Lirik i vitit.

Në vitin 2021 mbrojti doktoratën, me temën: “Kënga Popullore Qytetare e Elbasanit dhe vendi i saj i Rëndësishëm në Trashëgiminë Kulturore”.

Aktualisht është shef i Departamentit të Kantos në Fakultetin e Muzikës, pranë Universitetit të Arteve, Tiranë