Suela Armata ka debutuar në letërsi në vitin 2019, me vëllimin e saj të parë me poezi “Dremitja e lumturisë”. Ky libër është prezantimi fillestar me lexuesin që gjen në poezitë e vëllimit një pasqyrë ku reflektohen përjetimet dhe emocionet e brendshme të gjithkujt. Nga ky moment, Suela Armata vazhdon udhëtimin e saj poetik, krijimtaria e saj përfshihet në disa antologji poetike dhe në vitin 2021 ajo boton librin e dytë me poezi “Kur flet ndjenja” që frymëzohet nga emocionet dhe refleksionet e thella. Me fjalët dhe ndjesitë që komunikohen plot finesë, autorja hedh dritë mbi misterin e shpirtit dhe i jep kuptim të ri ndjenjave të pashprehura më parë. Në romanin e saj të parë “Shitësja e ëmbëlsirave”, Suela Armata ndërton një botë që merr nga përditshmëria dhe pasurohet me teknikat e rrëfimit letrar. Në këtë libër shpalosen në mënyrë të prekshme dhe të thellë të gjitha ndjenjat, vuajtjet dhe gëzimet e një gruaje që përballet me jetën, duke shfaqur fuqinë dhe këmbënguljen për të vazhduar udhëtimin, për të krijuar të nesërmen e jetës, ku emocionet dhe dashuria janë kambana që ngjallin kureshtjen, që prekin zemrën dhe mendjen e lexuesit pashmangshmërisht.