Ferhat Dinosha u lind më 13 shkurt 1954, në Dinoshë, afër Tuzit (Mali i Zi).

Më 1978 u diplomua në Fakultetin e Filologjisë të Universitetit të Prishtinës, Dega e Gjuhës dhe e Letërsisë Angleze. Deri në fillim të viteve ‘90-të ka punuar gazetar e përkthyes, në Mal të Zi dhe në Kosovë. Më 1990 kthehet nga Prishtina në vendlindje, ku i bashkohet partisë së parë shqiptare, Lidhjes Demokratike në Mal të Zi. Më 1993 është ndër themeluesit e partisë tjetër shqiptare, Unionit Demokratik të Shqiptarëve (UDSH). Më 1996 bëhet deputet i UDSH-së në Parlamentin e Malit të Zi, ku do të zgjidhet edhe për disa legjislatura të tjera. Më 1998, pasi partia në pushtet e z. Milo Gjukanoviq ndahet nga politikat e Slobodan Milosheviqit, bëhet ministri i parë shqiptar në qeverinë e parë antimilosheviqiane, ku do të ketë edhe një mandat tjetër, deri në vitin 2012.

Në periudhën 2012-2016 merr detyrën e ambasadorit të Malit të Zi në Republikën e Shqipërisë. Në vitin 2016 bëhet ambasadori i parë i Malit të Zi në Republikën e Kosovës, deri në vitin 2021. Në periudhën 2001-2012 kryen edhe funksionin e kryetarit të UDSH-së. Në vitin 2006 bëhet partneri kryesor shqiptar i presidentit Gjukanoviq, në kampanjën për pavarësinë e Malit të Zi. Më 10 qershor 2003, me rastin e 100-vjetorit të saj, Presidenti Historik i Kosovës, Dr. Ibrahim Rugova, e dekoron me Medaljen e Artë të Lidhjes së Prizrenit. Aktualisht është në krye të Unionit Nacional Shqiptar (UNSH).

Ka botuar ndër vite: një vëllim me poezi, titulluar “Lama e Doklit “ dhe dy libra publicistikë, përkatësisht “Një nënë kanë edhe bletët” dhe “Nga pavarësia në pavarësi “. Është i martuar dhe baba i katër fëmijëve.