“C 35 US” rënë në tokën shqiptare

Fillim nëntori i viti 1943. Një avion ushtarak amerikan niset nga baza ajrore e Katanias (Itali) drejt Barit, për të marrë ushtarë amerikanë të plagosur rëndë dhe për t’i sjellë në spitalin e këtij qyteti. Por, për shkak të kushteve të vështira atmosferike, goditjeve të kundërajrorëve gjermanë dhe prishjes së radiomarrësit, avioni bie në Belsh të Elbasanit. Që këtu, dhe gati për dy muaj, nis aventura e tyre në tokën shqiptare, plot ankth dhe të papritura, për t’iu shmangur dhe për të luftuar kundër forcave gjermane, që i ndjekin këmba-këmbës, derisa me ndihmën edhe të njësive partizane dhe balliste, që bashkohen, duke lënë mënjanë kontradiktat e ashpra midis tyre, shkojnë drejt shpëtimit, drejt lirisë.