Përjetime në vargje

Vëllimi “Përjetime në vargje” i autores Loreta Vaso sjell një frymë të freskët e interesante. Në poezitë e këtij vëllimi ka kërkim në stil, figuracion të pasur poetik, me një shtrirje mendimi që i qëndron mirë gjuhës poetike. Në të trajtohen tema si malli, ekzistenca, e shkuara dhe kujtimet, çaste të përjetshme, dashuria, miqësia, magjia e natyrës, marrëdhënie të ndryshme njerëzore, copëza të shumta jete. Poezitë për fëmijë janë gjithashtu të veçanta, aty hasim momente të bukura për një fëmijë të vogël që nëna e sheh tek rritet dhe tek zbulon botën dalëngadalë. Vjershat përçojnë shumë dashuri, detaje të imta të jetës së përditshme të fëmijës, prindërve dhe gjyshërve, të dhëna me gjuhë të kapshme për të vegjlit dhe të këndshme për veshin e të rriturve që ua lexojnë. Në vëllim evokohet edhe poezia me vargje jugore të Bregut të Detit, ku gjejmë po atë jehonë, po atë fjalor, po atë atmosferë të erës së detit dhe malit, po atë pasion dhe po atë fuqi që ndeshim në poezinë tradicionale të zonës.