Nitroglicerinë

nitroglicerinë

në triadën time psikike

kam gjetur

shumë nitroglicerinë

shumë morfinë të simfonisë suaj

kam gjakun tuaj që shkruaj këto poezi

kam venat tuaja që më vështrojnë në çdo vegulli vetmie

kam nitratin tuaj të argjendtë në lotët e mi të lumturisë

kam glicerinën tuaj të parfumuar për zbutjen e dhimbjeve të mia

muzika juaj e pambuktë më nanuris e më vë në gjumë

netëve anemike dhe atrofike

kur muzika ime i ngjason një marshi funebër

kam shumë nitroglicerinë nga ju

për të normalizuar tensionin tim të brendshëm in situ

shoh dritën të shpërthejë mbi vernikun e diellit

kur gëlltis tabletat e nitroglicerinës (që m’i keni dhënë me kaq dashuri ndër vite)

pas sulmeve në zemër

ju dua, f. d.