Rrugëtim drejt identitetit 2019-2020 (Il cammino verso l’identità) është një projekt përkthimi letrar i Botimeve Toena, mbështetur nga programi "Creative Europe" i Komisionit Europian.

Projekti "Rrugëtim drejt identitetit", i cili përmban 7 romane të shkruara në 5 gjuhë europiane (italisht, greqisht, frëngjisht, gjermanisht dhe anglisht) synon të krijojë një kolanë me të njëjtin titull, që do të sjellë për publikun 7 vepra që i përkasin një letërsie të rëndësishme europiane përmes disa autorëve të rëndësishëm, të njohur dhe të vlerësuar si në një kontekst kombëtar ashtu edhe ndërkombëtar. Projekti synon të tërheqë vëmendjen e një grupi të madh lexuesish, si lexues fillestar dhe lexues të fortë, por edhe lexues të specializuar, dhe mbi të gjitha ai synon të arrijë edhe te lexuesi emigrant i cili ka jetuar jashtë për disa breza dhe ka nevojë që pas një rrugëtimi të gjatë në përshtatje me kulturën pritëse të mund të dëgjojë dhe lexojë në gjuhën e tij. Diversiteti i letërsisë europiane pasqyrohet mbi të gjitha në fillin e përbashkët që përshkon të gjitha romanet e zgjedhura: rrugëtimi i vështirë dhe jo i parashikueshëm i njeriut në botë dhe brenda vetes në kërkim të identitetit të tij, duke u përplasur me botën e jashtme dhe atë të brendshme në kërkim të hapësirës së tij dhe kohës individuale, por në të njëjtën kohë edhe të asaj globale së bashku me njerëzit që e shoqërojnë gjatë këtij udhëtimi.