Historia si një mushkë

Ky lloj ngacmimi më është dukur gjithmonë si përpjekje e fshehtë, nga ana e të moshuarve, për të zhvlerësuar atë që jep mosha e re. Është e shëmtuar zilia e pleqve. Plaku në fjalë bashkë me të riun kishin gjithë ditën që udhëtonin me diellin mbi kokë dhe tani, befas, ai ishte larguar, me një kërcim kishte dalë përpara tyre dhe sikur prehej një çast në qafën e malit, duke i parë të dy udhëtarët drejt në fytyrë. Atje lart, në qafë të malit, duhej të ngjiteshin doemos edhe plaku bashkë me të riun, pa vonesë, domethënë para se të binte nata, dhe doemos të dy bashkë, për të zbritur pastaj po ashtu të dy në anën tjetër, ku ishin ata, që i prisnin.