Ata ishin (mbetën) dy

TJETRI

Tjetri na shërben në njëfarë mënyre

për të parë veten si para pasqyre,

me korniza të thyera, gjithë vjetruar

në rendin gjërave për t’ua ndërruar.

Tjetri është shuma e gjërave që

nuk deshëm kurrë të na ndodhnin;

kundër-ëndrra jonë e parë çdo ditë

se tjetri besnik na shërben si sitë

për zhavorrin e veseve dhe gjesteve

tiparet e sekteve, pre e preteksteve.

Tjetri është, le të themi, mungesa,

njëkohësisht ploti, njëkohësi​​sht shtesa

vija e drejtë për te fundi, është kthesa

gjarpërimi ynë, përrethi, lakesa.

Tjetri jam unë me një mijë brenga,

tjetri është ai, sa herë e prek lemza,

tjetri është gjithsej tabelë qitjeje

ku shmangim beftë çdofarë përpëlitje

pak duke folur, pak duke vrarë;

tjetri është aludimi ynë - mullarë.

Tjetri janë ata që ne dot s’u bëmë,

ose jemi ne, nga vetja përzënë.

Tjetri është kushdo që duke kërkuar

veten e gjen kacavjerrë me duar.