Sallaku ose si qeshnim nën diktaturë

Skënder Sallaku ka qenë dhe do të mbetet një artist fenomenal dhe një njeri me zemër të madhe. Askush nuk do ta mbajë mend atë për një fjalim të zjarrtë në ndonjë kuvend, për shpalljen e ndonjë manifesti sipër një tribune, për ndonjë intervistë historike në radiot, që nga mijëra kilometra larg synonin përmbysjen e diktaturës në Shqipëri. Rolin e tij në përpjekjet për dritë, mençuri, liri e përparim ai e zgjodhi aty ku cilësitë e tij vetjake e ndihmonin të bënte sa më shumë për triumfin e tyre. Serioziteti i tij për t’i mbajtur shqiptarët të qeshur është një shembull prekës dhe frymëzues.