Itaka ime

Të dashur lexues, adhuronjësit e penës sime, jo rrallëherë më qëllon të më pyesin se ku qëndron sekreti i punës sime, i rrugëtimit tim artistik. Më në fund, mendoj, se e kam një përgjigje. E gjithë puna ime, në të vërtetë, mban në vetvete një sekret: forcën dhe vitalitetin për të ecur, për të mbërritur, dhe prapë për të ecur... Sekreti i forcës sime janë rrënjët. Jam mbajtur fort pas tyre dhe, kur them rrënjët, nuk kam parasysh thjesht rrënjët e mia biologjike. Jo! Kam parasysh rrënjët që më kanë ushqyer shpirtërisht, artistikisht, moralisht, e që janë rrënjët e trevës ku linda e u rrita, të qytetit nga vij, qytetit dhe qytetarisë, që më kanë bërë kjo që jam.