Gojëdhëna popullore dhe fabula për të rritur

“Gojëdhëna popullore dhe fabula për të rritur” është një libër që sjell para lexuesit urtësinë, përvojën dhe shpirtin e trashëguar të popullit ndër breza. Në një kohë kur shumë vlera rrezikojnë të harrohen, autori rikthen në kujtesë histori të dëgjuara që në fëmijëri pranë sofrave familjare, aty ku të moshuarit rrëfenin ngjarje jetësore plot mësime dhe domethënie.

Këto tregime nuk janë thjesht rrëfime popullore, por pasqyrim i jetës njerëzore me të gjitha ngjyrat e saj: dashurinë dhe sakrificën, drejtësinë dhe padrejtësinë, ndershmërinë, dinakërinë, besimin, pabesinë dhe moralin njerëzor. Përmes tyre autori vlerëson zgjuarsinë popullore, zakonet dhe virtytet e trashëguara, por njëkohësisht nxjerr në pah edhe dobësitë e shoqërisë.

Libri i drejtohet çdo lexuesi, veçanërisht të rinjve, si një mundësi për të reflektuar mbi jetën, sfidat dhe të vërtetat që ajo mbart. Ndërsa në pjesën e fabulave, autori kalon në një plan tjetër, atë të realitetit politik dhe shoqëror të ditëve tona. Me ironi të hollë dhe sarkazëm therëse, ai personifikon figurat politike përmes kafshëve, duke krijuar fabula moderne që pasqyrojnë paqëndrueshmërinë, absurditetin dhe kontradiktat e kohës sonë.

Ky libër është një thirrje për të mos harruar rrënjët, për të ruajtur kujtesën popullore dhe për të kuptuar më thellë natyrën njerëzore dhe shoqërinë ku jetojmë.