Neighbours 2021-2022 (Fqinjët) është një projekt përkthimi letrar i Botimeve Toena, mbështetur nga programi “Creative Europe” i Komisionit Europian.
Njihni fqinjët tuaj është një projekt që lidhet me përkthimin, botimin, shpërndarjen dhe promovimin e shtatë titujve, pjesë e një kolane me titull “Fqinjët”, që synon të prezantojë për lexuesit shqiptarë në Shqipëri dhe në Diasporë (ku jetojnë dhe punojnë shqiptarët) 7 shkrimtarë të shkëlqyeshëm dhe vëllimet e tyre përmes një sërë aktivitetesh që do të zbatohen gjatë një periudhe 24 mujore. Paketa përmban tre autorë të njohur nga lexuesit shqiptarë nga përkthimi i tyre i mëparshëm në gjuhën shqipe: Eric-Emmanuel Schmitt, Giannis Kalpouzos dhe Drago Jančar, të cilët janë autorë të njohur në vendin e tyre dhe jashtë vendit, dy nga tri vëllimet kanë fituar çmime të rëndësishme kombëtare letrare. Gjithashtu ka tre fitues të çmimit prestigjioz EUPL në vite të ndryshme: Kalin Terzyiski, Réka Mán-Várhegyi dhe Răzvan Rădulescu dhe një autor debutues nga Italia Jonathan Bazzi, romani i të cilit tashmë ka fituar disa çmime dhe është në listën e ngushtë të çmimit letrar Strega.
Ky projekt synon të tërheqë vëmendjen e një grupi të madh lexuesish, si lexues fillestar dhe lexues të fortë, por edhe lexues të specializuar dhe gjithashtu të kontaktojë lexuesin emigrant që do të përfitojë nga tema kryesore e kësaj kolane. Veprat do të botohen si në formatin tradicional ashtu edhe e-book. Ky projekt ka si synim të trajtojë disa tema të rëndësishme si: përkthimi nga gjuhët e vogla në gjuhë të tjera të vogla (hungarisht, sllovenisht, rumanisht dhe bullgarisht); një diskutim të rëndësishëm shoqëror për çështjen e “lagjes” në ditët moderne, ku banorë të saj nuk janë më vetëm vendas, por edhe fqinjë të huaj, të ardhur për arsye të ndryshme në Shqipëri. Për të njohur më së miri fqinjët tanë rruga më e mirë mbetet ajo e letërsisë së tyre, pasi letërsia na ndihmon të kuptojmë dhe njohim atë që është i ndryshëm nga ne, por që mund të na pasurojë me ndryshimin e tij dhe me shkëmbimet e shëndetshme që na sjell njohja, ndryshe nga paragjykimi apo keqgjykimi.